[ دروس تصوير ] الدرس رقم ١٠ – معلومات الصورة EXIF

السلام عليكم ورحمة الله وبركاته

في أحيان كثيرة ووقت مشاهدة الصور أو مشاركتها في المواقع والمنتديات يجونا ناس يسألوننا (وش إعدادات الصورة)

وش استخدمت أي كاميرا ؟

أي عدسة ؟

كم كان البعد البؤري ؟

فتحة العدسة كم كانت ؟

….. الخ

طبعاً إذا عندنا كاميرا وحدة وعدسة وحدة بيكون سهل مرة اننا نتذكر

بس المشكلة لو كنا مسافرين ونصور لمدة شهر وعدتنا هذا شكلها

الله يرزقنا إن شاء الله

نرجع لموضوعنا

بعد السفر لمدة شهر .. ومراجعة (٢٤٨٧٢٣٦٢٣٨٩٣٤٨٧٥) صورة

صعب جداً اننا نتذكر كل صورة وش استخدمنا معها ؟ وكل الاعدادات

بس لا ننسى اننا في عالم رقمي .. والصور رقمية

وتقريباً كل شيء رقمي يكون فيه بيانات مخزنة في مكان ما

هالمكان في الصور اسمه EXIF ويعني  Exchangeable Image File

EXIF

وهو اختصار لــ Exchangeable Image File والترجمة يمكن ما تساعد كثير (ملف الصورة القابل للتبادل)

بس معناه انه هو ملف يحمل مجموعة من البيانات

نحصل هذا الملف في كل مكان (نقدر نشوفه من الفوتوشوب أو من خصائص الملف نفسه)

إذا نبغى نعرف المعلومات عن طريق الفوتوشوب نتبع الخطوات التالية

- نفتح الفوتوشوب

- نفتح الصورة

- نروح لقائمة File أو ملف

- نختار Image info أو معلومات الصورة

 وبعدها نروح لقائمة Camera Data أو بيانات الكاميرا

وهذا شرح لكل معلومة في الملف

١- اسم الشركة المصنعة (ممكن كاميرا – أو جوال)

٢- الموديل – ومعها السيريال نمبر الخاص بالكاميرا

٣- نوع العدسة المستخدمة

٤- البعد البؤري المستخدم وقت التصوير

٥- سرعة الغالق

٦- فتحة العدسة

٧- الآيزو

٨- وضع التصوير

٩- الميترينق – سيتم شرحه في موضوع قادم بإذن الله

١٠- حجم الصورة

١١- الدقة المستخدمة

١٢- الفلاش ـ مستخدم أو غير مستخدم وقت التقاط الصورة

شايفين وش كثر بيانات نقدر نطلعها من الـ EXIF

وفيه غيرها بعد .. مثل وقت التصوير – تاريخ الصورة – وضع الكاميرا (بورتريه أو لاندسكيب) ،، الخ

من خصائص الصورة نقدر نشوف الخصائص بهالشكل

انا في الماك طلعتها بهالطريقة

- نضغط بالزر الأيمن على الصورة

- نختار Get info

بعدين نشوفها بهالشكل

في حالة استخدامكم لويندوز

نسوي نفس الشيء

- نضغط على الملف بالزر الأيمن

- نختار خصائص أو properties

- نختار تفاصيل – Details

(استخدمت صورة من الانترنت – عشان كذا فيه اختلاف في البيانات)

هذه البيانات تقدرون تشوفونها في أغلب الكاميرات الرقمية وكاميرات الجوال،

كل اللي عليك انك بس تنسخ الصورة وتشوفها في الكمبيوتر.

في حال تعديل الصورة وحفظها مجدداً ممكن تخسر البيانات.

في كثير من المسابقات الخاصة بالتصوير يطلب من المشاركين تقديم صور فيها بياناتها للتأكد من ملكية الصور